Naor et mooie Twente

Dit is een laet dagboekstokkien, mar kammeraod Haarm en ik bin de hiele dag naor Gé en Margreet in Boorn oftewel Borne in et wondermooie Twente west. We kennen heur al 50 jaor. In de beginjaoren van de Stellingwarver Schrieversronte biwwe mit heur in de kunde kommen doe we op vesite gongen bi’j de Kreenk veur de Twentse Spraok. Eerst gongen we alle jaoren, mar doe brocht corona de boel in et ongerede. Daornao biwwe d’r weer hennegaon, alhoewel we d’r vleden jaor niet west hebben. We bin oold wodden deur de jaoren henne en dan is d’r wel es wat. We hebben in de loop van de morgen bi’j heur in de tuun een lekker brotien eten en doe hewwe Margreet veerder allienig laoten.We hebben een kuier deur Boorn maekt en in et kultuurhuus mit de biebeltheek keken en in et Mariakapellegien. Vervolgens biwwe in de auto naor de Kroezeboom in Fleringen reden. Daor wawwe 50 jaor leden ok west. Et is een allemachtig oolde boom van wel 600 jaor oold, die mit staolen pinnen bi’j mekeer hullen wodt. We hebben ok nog een monement bekeken van moterrieders die daor verongelokt weren in et verleden. In Saosel oftewel Saasveld hewwe Gerard Wolbert troffen. Hi’j het oons de roomse karke zien laoten die ankem jaor 100 jaor wodt. Een karke mit schitterende braandschilderde raemen die maekt binnen deur Jan Schoenaker. Wat een mooie kleuren! Ok de staosies rondomme in de karke weren et bekieken meer as weerd. Gerard kon prachtig over van alles vertellen. Hi’j het oons ok et prachtig onderhullen karkhof en de tuun zien laoten. Nao ofloop hewwe wat drinken had in de pasteri’je en we kregen d’r koekies bi’j in de pauselike kleuren: geel en wit. We hebben lekker waarm eten had in resteraant De Molen naost de meule van Fleringen. Daor gaon we vaeke henne te eten awwe in Twente binnen. Om 20 veur 8 biwwe nao een mooie dag in de auto stapt en naor huus reden. Hieronder twie foto’s die ‘k vandaege maekt hebbe. Boven: dit is et Mariakapellegien in Boorn. Dit kapellegien komt veur in mien roman Toegift. We hebben d’r alle drieje een keersien ansteuken. Onder: de Kroezeboom en et kapellegien d’r naost in Fleringen.