Naor de stad Blokziel

Via de Lendediek en de oolde zeediek biwwe in de loop van de morgen naor Blokziel gaon. Daor hewwe eerst wat dronken in et Preens Mauritshuus. Ik hebbe d’r een hiempe Blokzielder Brokke bi’j had. Die he’k daor trouwens ok kocht en mit naor huus neumen. Vervolgens hewwe een kuier deur et prachtige plak maekt. Et resteraantien De Halte waor mien verhael Blokziel speult en wa’k al wel honderden keren verteld hebbe, is d’r altied nog. Daor stopten mien moeder en heur kammeraodske Iebeltien van alles in de tassen. En doe biwwe naor et museum gaon om dat te bekieken. We hebben eerst een film over et Blokziel van vroeger bekeken. Hiel mooi.Van alles over de geschiedenis. In de Tachtigjaorige Oorlog keus Blokziel votdaolik veur Oranje. Preens Maurits (zeune van Willem van Oranje) profiteerde zodoende van de haven van Blokziel. Hi’j verliende Blokziel alderhaande veurrechten. D’r staot een groot beeld van Maurits in et museum. Laeter het Blokziel ok nog stadsrechten kregen, mar een jaor laeter bin die op een wondere meniere heur weer ofpakt. Schaandelik vanzels! Een jaormennig leden hebben ze keuning Willem-Alexander een brief schreven as die Blokziel niet asnog weer stadsrechten geven kon. D’r kwam een brief weeromme. De keuning het die bevoegdhied niet meer. Schaandelik vanzels! Netuurlik moet de keuning dit veurrecht weerommekriegen en moet Blokziel asnog (weer) een stad wodden. Dat he’k ok in et gaasteboek schreven. Doe de film oflopen was wol de man van et museum mi’j testen en vreug me wanneer as de Tachtigjaorige Oorlog begonnen was. Now, dat wus de Stellingwarver schriever zonder die film ok wel. Wat daenken ze wel niet! In et museum was vanzels andacht veur de schipsmaekeri’je, et reizen mit et beurtschip naor Stienwiek, Meppel en Zwolle, de mattemaekeri’je en veenderi’je. Et wodt daor hiel mooi tentoonsteld. D’r stonnen ok drie oolde stoelen uut et vroegere ‘stadhuus’.  Stoelen mit griffioenen boven op ‘e roggeleuning. Ik zag et drekt. In de vlaggen en waopens van Oost- en West-Stellingwarf komt ok een griffioen veur. Ik vertelde heur dat. Ze wussen hielemaole niet dat d’r griffioenen op die stoelen stonnen en ze wussen ok niet wat een griffioen was! En dan mi’j uutheuren over de Tachtigjaorige Oorlog! Mar et was allemaole hiel plezierig. We hebben de Grote Karke ok van binnen bekeken. Een prachtige karke. Over zee- en Lendediek biwwe naor de Driewegsluus gaon en daor hewwe eten. Om vier ure heb ik daor een twaelfuurtien had. Hieronder nog twie foto’s. Boven: gezicht op ‘e Grote Karke van Blokziel en… d’r staot een sturk op et nust. Onder: de Kolk van Blokziel. Van hier veerde vroeger de boot mit passegiers, vracht en post naor Schoklaand. Daor wawwe twie weken leden. Zo is de cirkel rond!