Naor de kapper

Gister stuurde Jolanda Hofland me et interview toe dat ze tillefonisch mit me had het veur et tiedschrift Landleven. Ik hebbe et naokeken, wat kleine veraanderings anbrocht en et heur doe weer toestuurd. Et is de bedoeling dat et in et feberwaorinommer komt. De kommende maendagmorgen komt d’r een fotograaf om me op petret te zetten. Omda’k netties op ‘e foto wil, he’k vandemiddag op ‘e fiets naor kapster Bertha in Et Vene west. Een fietstochien henne en weeromme van 33 kilemeter. Et was mooi weer. Mar doe ‘k op ‘e oolde rieksweg in Hooltwoolde zat begon et te regenen. Een vervelend bujgien. Ik stapte van de fiets om de regenbroek an te trekken. En dat zol krek wezen doe ‘k een verschrikkelik hadde klap op ‘e sneldiek heurde. Et dee blieken dat de rechterveurbaand van een grote vrachtauto klapte en ik zag him as et waore verschrompelen. D’r kwam zo te zien gelokkig gien mal ongelok van. Bi’j Bertha he’k eerst een koppien Turkse thee mit een stokkien koeke mit botter d’r op had. Vervolgens het ze goed een ure wark had om me een klein betien toonber te maeken. En doe kree ‘k een plakke desembolle mit geitekeze en een bakt ei d’r op en ok nog een plakke maïsbolle mit plakkies waarme rollade. Allemachtig nog an toe! En as besluut nog een koppien Turkse thee mit twie sukelaogies. Mit een vol lief bin ‘k daor weer op ‘e fiets stapt en deur de bossen van Et Woold weer op huus an gaon. Hieronder een foto die ‘k daor maekt hebbe. Dit is et Huus Oranjewoold tussen de haastkleuren. Op dit plak ston vroeger et zoemerverblief van de Friese Nassaus.