Naor De Gediek

Ik misse et nog altied dat d’r gien boekewinkel meer in Wolvege is. Waor moe’k now henne? Et eerste daenk ik dan an Et Vene en Oosterwoolde. Mar zoveer hoef ik vanzels niet vot veur een prima boekewinkel. Ik bin vandemorgen op ‘e fiets naor De Gediek west. Daor is boekewinkel Planteyn daor ze mien boeken ok altied te koop hebben. De vrouw in de winkel vreug drekt a’k lichtkaans verwaachtte om in et Stellingwarfs hulpen te wodden. Now ja, et liefste wel vanzels. Mar och, ik wil ok niet overvraogen. Et was trouwens heerlik fietsweer, mar wel wat wienderig. D’r staot de laeste tied vaeke nogal wat wiend. De zunne was d’r vandaege eerst ok niet bi’j, mar et was 23 graoden en dat is een heerlike temperetuur. Op ‘e weerommereize he’k bi’j de Koepelbos in Berkoop een brotien hamburger behaffeld en doe bin ‘k over De Hoeve naor huus gaon. Mit mekeer een mooi tochien van 38 kilemeter.

Eregister he’k een fout maekt in et dagboekstokkien. Het gieniene dat zien? Ik hadde doe een prachtige ronde en oranjekleurige stien kocht in Orvelte. Ik schreef dat et een selemiet was. Dat was niet zo, et is een seleniet. Ien klein lettertien verschil. Seleniet kalmeert, et maekt je rustig en helder van geest. As zoe’n stien midden in de kaemer ligt, en dat ligt hi’j, dan straolt et ok of op ‘e meensken die bi’j je over de heerd kommen. Die ondergaon dan ok een vredig en rustgevend gevuulte. Et zal me ni’je doen mit de volgende vergeerdering van de JVS. Dan moe’k et marken kunnen en dat zal ok zeker zo wezen.

D’r kwam een kaorte van Jan en Diana. Die zatten oflopen weke in Arcen, in et noorden van Limburg. Boven een prentien van et kesteel van Arcen, daor bin Jelle en ik ok al es west.