Naor De Gediek en Langzwaogen

Eindelik is et dan prachtig zoemer- en fietsweer. Ik hebbe daor vandaege volop van profiteerd en 60 kilemeter fietst. Vandemorgen naor fysisosport in Wolvege en doe weer naor huus. Daor was Anke doende en maek et huus schone. Nao een prakkien makkeroni bin ‘k om ien ure weer op ‘e fietst stapt en over Berkoop en Jubbege naor boekhaandel Planteyn op ‘e Gediek fietst. Daor he’k een besteld boek ophaeld: Het Droompad van Twan Huys. Mit zien puberzeune Jack het hi’j een kuiertocht over de hoogste bargen van Europa maekt. Vier weken en 555 kilemeter, deur omstaandigheden uutsmeerd over een periode van twie jaor. Et is een vader-zeune boek en d’r wodt ok rouwt. De oolden van Twan Huys raekten uut de tied. Hi’j praotte altied Limburgs mit zien oolden. Dat kan now niet meer en dat is een gemis. In een interview nuumde hi’j et Limburgs laestdaegs de tael van zien hatte. Van De Gediek bin ‘k naor Langzwaogen reden. Daor he’k aanderhalf ure bi’j ex-kollega Piet in de tuun zeten te praoten en ik hebbe d’r wat drinken had. Van Piet kreeg ik de boeken: Nieuwe avonturen van Garriet Jan en Annegien en Eldersloo, Drentse schrievers an de reize. Over Jonkerslaand bin ‘k weer naor De Gediek fietst. Mien ome Ids en tante Jehanne begonnen hier drekt nao heur trouwen mit wat boerkeri’je. Mien moeder het heur doe hulpen om de boel schone te maeken. Dat is now een kleine honderd jaor leden. Tegen vuuf ure wa’k weer thuus. Hieronder nog een foto die ‘k op ‘e Gediek maekt hebbe. Dit bin de botterwaoge en et postkantoor an et waeter. Ze bin daor zo verstaandig west en hool zokke mooie oolde gebouwen in ere. In Wolvege en Et Vene hebben ze et oolde postkantoor tegen de vlakte sleugen. Mien moeder zol zeggen: aj’ gek wodden komt et je in de kop an.