Naor Antje in Zwolle

Vandemorgen he’k op ‘e fiets naor fysiosport in Wolvege west en daornao he’k naor een waarme bakker west om wat lekkers mitnemen te kunnen a’k morgen naor Zeelaand gao. Vandemiddag he’k naor Antje in Zwolle west. Ik gong as joongien mit kammeraotien Wube hiel arg lange leden uutvanhuus bi’j Antje heur oolden in Blesdieke. Goed 70 jaor leden… Antje was doe een jongemeid en hadde verkering mit Dick uut Blokziel. Dick is d’r al een jaormennig niet meer, mar Antje gelokkig nog wel. Ze wodt ankem weke 90 jaor. We hebben genoeglik een peer uurties praot en vanzels ok over oonze kwaolen en kwaolties en die van aanderen. Dat heurt bi’j de leeftied.

Hieronder nog een foto die ‘k gister maekt hebbe op Schoklaand bi’j et resteraant daor we op et terras zeten hebben. D’r wodt daor goed veur honnen zorgd. Dat is mooi. Mar ik laote disse foto mar niet an poes Marja zien. Die zol d’r slimme opsternaot van wodden. Wel een bar veur honnen en niet veur katten? Wat een diskriminaosie!