Naeme verzinnen

En inienend is et weer lekker waarm weer. Ik bin vandemiddag even nao twaelf ure op ‘e fiets naor Wolvege west om bosschoppen te doen in de lange broek en een jak an. En doe wodde en was et me inienend zuver te waarm. Wat een wonderlik weer, mar wel lekker. De kotte broek kan weer an!

De Stellingwarver Schrieversronte gaot van ’t jaor verhuzen. Ze blieven in Berkoop en ok an dezelde straote. Vanuut et oolde gebouw waor veur de Schrieversronte de Veurschotbaank in zat gaon ze now naor et grote witte gebouw daor vroeger de Baank Bercoop (opvolger van de Veurschotbaank) in zat. Dat grote gebouw hiet now Business Centre Bercoop, mar now de Schrieversronte d’r inkomt vint de eigener dat die naeme eins veraanderen moet in een Stellingwarver naeme. Dat now kun de meensken naemen insturen. Ik hebbe ok wat bedocht en instuurd. Et is niet iens zo makkelik en bedaenk wat moois.

Et is vandaege al weer een weke leden dat Jelle en ik veur een midweke naor Lochem gongen. Nog ien keer een foto van die mooie weke. Dit is de waetermeule die bi’j kesteel Hackfort staot. Twente en de Aachterhoek hebben prachtige waetermeulen. Spietig dawwe die hier niet hebben.