Mysterie

Et vervolg van et mysterie van de levendige moes die eregister deur poes Marja in de kaemer brocht is en daor doe te zuke raekte. Ik hadde alle kassies een aentien van de mure of zet zoda’k d’r goed aachter kieken kon. Mar ja, waor die moes bleven was, was me een raodsel. En poes… gong lekker liggen te slaopen. Gister zag ik de poes inienend veur et vrieskassien in et aachterhuus zitten. Et was vanzels zo klaor as een klontien dat de bewuste moes daor doe aachter zat. Ik verscheuf et spul en daor flutte doe inderdaod een moes aachter weg. Mar waor naor toe? Dat was al weer de vraoge. Die dingen bin zo vlogge as waeter en ze passen in elk klein hoekien en gattien. Ik hebbe de poes in de kaemer laoten, de deure naor et aachterhuus ofsleuten en de buterdeure he’k gister de hiele middag losstaon had zodat de moes veilig votkommen kon. Ik hope dat dat gebeurd is. Dat daenk ik ok, want poes zit now nargens meer veur te loeren. Totdat hi’j mit ni’j speulgoed anzetten komt…
Et was vandaege een drokke dag. Ik hebbe verhaelen rippeteerd veur een optreden op woensdagmiddag in Makkum. Butendat he’k twie kollums in klad schreven en een lange brief mit een al lieke lange brief beantwoord. Ik hole elke dag ok iederkeer et ni’js uut Oekraïne in de gaten. Poetin het zien kernwaopens now op scharp zet, las ik op internet. Et begint mit de dag toch wel wat griezeliger te wodden. Oonze wereld is vermoedelik veur langere tied zomar inienend slim veraanderd. Ik hebbe groot respekt veur de president en et volk van Oekraïne!