Museumdag

Deur de hitte wodt mien agenda disse weke hielemaole ommegooid. Morgen za’k nog wel naor de Aachterhoeke, mar we gaon daor niet fietsen. We weren van doel en gao vandaege lekker mit de boot et waeter op, mar dat zol niet zo lekker west hebben. Ie branen van et waeter of mit disse tempereturen. We hebben zodoende et prachtige Fries Laandbouwmuseum in Liwwadden bekeken en daor was et heerlik koel. We hebben d’r ok wat drinken had mit een koeke d’r bi’j. Wat is dat toch een schitterend museum! Doe et nog in Eernewoolde zat bin ‘k d’r wel es west. Mar et is now vule groter. Et zit veur een pat in een oolde boerderi’je uut et begin van de 19^de ieuw. Et gaot over de veeteelt en et beroemde Friese stamboekvee. Over de bouwboeren en et verbouwen van eerpels, sukerbieten, vlas, rogge, haever, cichorei en een protte meer. En dan alle oolde ark… Butendat was d’r vanzels een protte andacht veur et Friese peerd. Die aarme peerden die in de kelder ronties leupen mit de bliendkappe veur. Vreselik. En de draeveri’jen om de Goolden Zwiepe. En dan die mooie oolde films over et wark van vroeger. Een feest van herkenning. Mi’jen, hujjen, ruteren, opperen, tiemen, ploegen, eiden, dusken, botter- en kezemaeken… Prachtig om te zien. We hebben d’r echt van geneuten en bin d’r meer as twie uren west. En et was d’r dus heerlik koel. Doe we weer butendeure kwammen was et 33 graoden. D’r ston daor gien zochien wiend. Et was smoor- en smoorhiete. We hebben wat eten (een twaelfuurtien) op et terras van resteraant De Groote Wielen. Mooi an et waeter dus. Daor ston een betien wiend en zat et heerlik onder grote parresols. Et was daor 32 graoden. Doe we thuuskwammen in Ni’jhooltpae was et daor 34 graoden. Hieronder twie foto’s die ‘k vandaege maekt hebbe. Boven: een pat van de oolde boerderi’je daor et Fries Laandbouwmuseum in zit. Onder: et resteraant an de Groote Wielen.