Museum Kapteinshuis

Et was gister een mooie aovend in Niawier. D’r mossen stoelen bi’jzet wodden, dat is een goed teken. D’r kwam drekt een vrouw op me of die zee dat ik indertied vlakbi’j een zwaoger van heur woonde. Die zwaoger was Piet Winia. Ze hadde nog wel kontakt mit Meine en Antje, die mit mi’j op schoele zatten. Ik hebbe zegd dat ze heur de groeten doen mos. Een aandere vrouw kende Jan Koops en de vrouw wel. Die ken ik dus ok en ik hebbe vraogd as zi’j heur de groeten van me doen wol. Ik was gisteraovend om goed kwat over 11 weer thuus.

Gister en vandemorgen betied om half achte hewwe overlegd awwe vandaege fietsen zollen of niet. Et weer leek bewolkt en wat somber te wodden mit mar een inkelde keer zunne. Dan toch mar niet fietsen. Mar et hadde best wel kund, d’r was vaeke wel zunne. Die misselike weerperfeten lullen d’r bi’jtieden ok mar wat in omme. We bin zodoende naor Museum Kapteinshuis in Ni’je Pekela west. Wat een mooi klein museum. Et is in 1799 as huus van een schipskaptein bouwd. D’r was doe een geweldige Veenkloniaole schipvaort naor Ruslaand, de lanen om de Oostzee henne, Engelaand en zels Amerike. D’r weren wiethoevule schipsbouweri’jen. Ie kun je dat now haost niet meer veurstellen. Uut al die lanen nammen die kapteins prachtig spul mit. Zulveren Oostzeelepels, prachtig posselein… Al dat moois kuj’ daor bekieken. Mooie kaasten, een schitterende beddesteewaand mit een diggelkaaste vol duur spul uut die tied. Een schouw mit mooie tegels… Wat zicht et d’r mooi uut. Et is allegeer keurig onderhullen. D’r was now een tentoonstelling van zulvergoed dat maekt is deur goold- en zulversmeden uut Oolde- en Ni’je Pekela. D’r weren d’r indertied wel vuuftig van in die beide dörpen. Onveurstelber. Dat betekent dat et daor een hatstikke rieke streek was. We bin rondleided deur een peer slim gaastvri’je mannen (vri’jwilligers) die mooi vertellen konnen en we hebben d’r een film over et museum bekeken. Nao ofloop hewwe d’r een koppien drinken had. Nao et museum hewwe an west bi’j bakker Bos in Ter Apel om echt Grunnings hadbrood te kopen. Awwe daor in de buurt binnen doen we dat altied. En doe bin we op Borger an gaon en zo staorigan weeromme naor de Stellingwarven. We hebben lekker waarm eten had in et Witte Huus in Donkerbroek. Hieronder een foto van vandemiddag. Dit was et uutzicht vanuut et museum.