Morellen

In de winters van 19/20 en 20/21 he’k drok doende west en schrief een riegel wat langere verhaelen. Ontroerende en zeker ok verrassende verhaelen. Een soort verhaelen die ‘k eerder kwaolik schreven hebbe. Ik hebbe d’r in die beide winters mit mekeer 21 schreven. Ik was van doel en schrief d’r nog viere in de winter van 21/22. Dan zo’k d’r 25 hebben en dat was een mooi tal veur een boek. Mar doe kreeg ik veur de twiede keer in drie jaor burn out-klaachten en ik hebbe de laeste winter zodoende hielemaole niet an dat boek schrieven kund. Daor ha’k gewoonweg te min energie veur. Dat is zo staorigan wel wat bi’jtrokken, mar mit zokke grapmaekeri’jen lever ie energie in die laeter niet hielemaole weerommekomt. D’r lag liekewel nog een half ofmaekt verhael en dat he’k een schoffien leden wel klaormaekt. Zoas alle verhaelen he’k dit exemplaor ok drekt an Geertje en Jelle lezen laoten. Zi’j begeleiden me zoe’n betien bi’j disse klus wark. En… ze weren d’r tevreden over. Die laeste drieje schrief ik ooit grif nog wel es een keer. Niks moet meer drieven moeten. Dit 22ste verhael het as titel Morellen kregen. Et telt 1980 woorden. Et langste verhael in de serie telt tot now an toe 2678 woorden, et minst lange 1855 woorden.