Moord en doodslag

Ik hebbe et boek Moord en doodslag in Friesland van Fenno L. Schouwstra lezen. Een boek over allemaol waor gebeurde moorden in Frieslaand. Ze stonnen vroeger nogal gauw mit et mes klaor… D’r is iene moord in de Stellingwarven in beschreven. Op maendag 3 september 1923 was et overal feest in Nederlaand. D’r wodde vierd dat keuninginne Wilhelmina 25 jaor regeerd hadde. Op ‘e Blesse was et ok feest. D’r stonnen een peer dri’jmeulen, een schiettente en een Kop van Jut. Kefé Van der Berg leup vol volk. ‘We nemen d’r nog iene!’ reup et jongvolk. Aanderemorgens krigt de gemienteveldwaachter Koopmans van Blesdieke bericht van de dood van Aaltje ten Berge, de wedevrouw van Ernst Kappelsma. Ze wodde vunnen in de waeterputte, mar ze was niet verdronken. Laeter dee blieken dat zeune Jan heur om geld vraogd hadde om naor et feest te kunnen. Aaltje zat op ‘e stal de geite te melken en wol him gien centen mitgeven. En doe het Jan heur van aachteren mit een hoolten haemer de hassens insleugen en heur even laeter in de waeterputte stopt. Hi’j het et huus vervolgens naozocht om centen. Jan vun een tientien en mit dat geld is hi’j mit zien kammeraodske Grietje naor et keuninginnefeest gaon. As was d’r niks gebeurd. Jan Kappelsma kreeg levenslaank van de rechter.