Mooie wereld

As kiend vun ik sni’j al slimme mooi. Dan zat ik veur et keukenraem in et oolde huus en keek ik de sni’jvlokkies nao die naor onderen dwarrelden. En al die lange jaoren laeter vien ik sni’j nog altied hiel mooi. Een witte wonderwereld. Et is spietig dat de zunne d’r niet bi’j is. Ik hebbe vandemorgen eerst de oprit weer sni’jvri’j maekt. En nao een winterprakkien (stamppot koolrape) he’k an et begin van de middag een mooie kuier maekt deur de Weembos en bi’j de Scheene en mien oolde huus langes. Een protte meensken maekten zoe’n kuier. De honnen van de buurvrouw   weren hielemaole wild in de kop, zo mooi vunnen ze de sni’j. Poes Marja vint d’r niet vule an, die blift et liefste mar in huus. Hieronder twie foto’s. Boven: de grote laene deur de Weembos, pal naost mien huus. Onder: JB stuurde me disse foto toe. Dit is et prieeltien in de Meulebos in Berkoop. De Stichting die mien naeme dreegt het dat mooie prieel indertied betaeld.