Mooie aovend in de Karstenhoeve

Et is gisteraovend laete wodden in Museumboerderi’je de Karstenhoeve in Runerwoold. Ik was eerst nao middernaacht thuus. Et was dus een geweldig mooie en genoeglike aovend. Et vertellen gong prima, ik kon dichte bi’j de meensken staon. D’r weren zoe’n veertig bezukers. Waor vroeger de koenen stonnen, wodde now dus een prachtige aovend hullen mit verhaelen, gedichten en meziek. Zoe’n oolde boerderi’je het vreselik vule meer sfeer as een dorpshuus. Ria Westerhuis las gedichten van heurzels veur. Ok uut de bundel Minnezinne die zi’j en Delia Bremer schreven hebben. Mooie gedichten. Erotiek, liefde en fantesie… De meziek en zang van de Heeren Oud-Zuid was hiel mooi. Die mannen kun d’r wat van! De groep bestaot uut: Luc Oostra, zang en gitaar, Jan Kuipers, piano en akkordeon en Cor Toben, elektrische gitaar. Ze zingen een mingelmoesien van pop en chanson mit klassieke invloeden en bruken wark van Drentse dichters. En dan was d’r ok nog een pubkwis die verzorgd wodde deur Petra Hessels, de beheerster van de Karstenhoeve en heur partner Geert Jan Brader. Geert Jan zingt en speult piano. Hi’j trad vaeke op mit Marga Kool en Jan Veenstra. Petra las stokkies uut lieties die ze in et Drents vertaeld hadde. Et pebliek mos raoden om welk lietien et gong en dat wodde dan deur Geert Jan speuld en zongen. Nao ofloop he’k mit een protte meensken naopraot. Hieronder nog twie foto’s die maekt binnen deur Be Puister. Hi’j en zien vrouw Henny kwammen al es eerder naor me te luusteren: in Vledder en Noordwoolde. Be is een breur van de bekende Grunninger dichter en schriever Henk Puister. Henny fietst vaeke in de Stellingwarven. Ze is van hatte welkom as ze hier es weer in de buurt is en… ik thuus bin. Boven: Ria en ik wisselen et laeste ni’js uut. Onder: mit Henny an de praot.