Mooi Oavelt

Et was vandaege nog altied roezebroekerig weer en toch he’k een fietstocht van 52 kilemeter maekt naor vekaansiepark Mooi Oavelt in Haovelte. Ik bin daor op vesite west bi’j Jan en Anneke. Dat bin Stellingwarvers in de vremde. Ze wonen in de buurt van Benidorm, mar zoemers bin ze een goed vorrels jaor in heur huus in Haovelte. Half september gaon ze weer naor Spanje en mit de jaorwisseling bin ze hier weer even. Ik bin ok al es bi’j heur west op een vekaansiepark op ‘e Bult bi’j De Eese. Doe hadden ze daor een huus. Ze lezen dit dagboek en ze weren laestdaegs bi’j et optreden van Douwe en mi’j mit harpiste Sanne Bakker in Berkoop. We hebben vandemiddag aldergenoeglikst een flink schoft praot bi’j heur op et terras. Ik hebbe wat drinken en een lekker stokkien gebak had. Wat wil een meenske nog meer!

Gister kon ik jim gien foto’s zien laoten van de boottocht. Mar vanuut Spanje is alles gisteraovend in twie menuten weer in odder maekt. Hieronder dus de beide foto’s van gister. Boven: een boot onderweg naor et Sneekermeer. Wat een mooie wolkens! Onder: de hiele tocht over et Sneekermeer wodden we begeleided deur een pelisieboot. Now ja, de bekende Stellingwarver schriever en ereburger komt vanzels ok wel zoe’n escorte toe!