Molentaal

Vandemorgen he’k Martin op vesite had. Hi’j nam een maantien mit een protte lekkers d’r in veur me mit vanwege mien ni’je boek. Mar zoks hoeft vanzels hielemaole niet! Alhoewel dat spul in dat maantien wel hiel arg lekker is. We hebben een ure of wat genoeglik (bi’j)praot. Vandemiddag bin ik op vesite west bi’j Gooitske en Hieke in Wolvege. Ik hebbe heur et deur heur bestelde exemplaor van Naozoemerlaand brocht. Ik hebbe een peer koppies drinken bi’j heur had mit wat lekkers d’r bi’j. En mit heur he’k ok oe zo genoeglik bi’jpraot.

Ik hebbe et alderaorigste boekien Molentaal van Abel Darwinkel lezen. Ondertitel: De meul wet van gien wieken. Et is in 2007 uutgeven deur Het Drentse Boek, daor warkte Abel doe. Et is een mooi boekien over et Drents en meulen in Drenthe. In et boek bin ok gedichten over meulen opneumen van o.a. Peter van der Velde, Marga Kool, Anne Doornbos, Gerard Nijenhuis en Suze Sanders. Ok een mooi deur Abel vertaeld verhael van Jan van Ginkel en een fragment uut Dorre grond van Ben van Eysselstein. En veerder mooie foto’s van meulen en alderhaande aorige gegevens. Et woord meule is ofleided van et Laetlatiense woord molina of molinum. In et Stellingwarfs is et meule, in et Fraans moulin, in et Duuts: Mühle, in et Engels: mill, in et Spaans molino, in et Italiaans: mulina, in et Portugees: moinho, in et Pools: mlyn, in et Ieslaans: mylla, in et Deens: mølle, in et Nederlaans: molen, in et Drents: meule, meulen, meul, möl en mölle, in et Fries: mûne en mole.  Mar… aj’ mit meulties lopen, is et goed mis!