Johan Veenstra
Stellingwarver schriever en verteller

Moes

Plaetst op 11 feberwaori 2022.

Doe ‘k vandemorgen van bedde kwam ha’k et votdaolik in de gaten. Poes lag in mien slaopkaemer naor et kassien te kieken. Dat betekende vermoedelik dat hi’j een levendige moes mit in huus neumen hadde die now aachter et kassien¬† verburgen zat. En doe begon et gezelschopsspel veur drie personen: een man, een poes en een moes. Ik scheuf et kassien an de kaant. Man, poes en moes steuven deur de slaopkaemer en over de overloop. Op zokke mementen dot blieken dat poezen en moezen zo vlogge as waeter binnen. Meensken bin in wezen mar malle, logge wezens. Bekiek jimzels mar es in de spiegel. Even laeter wawwe mit ’n drienend toch toegeliekertied halverwege de trappe. In de hal he’k poes an de kaant raomd en een dekentien over de moes gooid. Die he’k doe butendeure loslaoten. Wat een vreselik gedoe op ‘e vroege morgen, mar ik was wel in ien keer hielemaole wakker. Now we et toch over poes hebben… De post brocht vandemiddag een deuze mit katteboeken van Akkie uut Raevenswoold. Mien daank is groot!
Omda’k gister in Sneek was he’k de goolden rit van Irene Schouten niet zien kund. Mar vandemorgen zat ik klaor veur de tien kilemeter van de manluden. Oonze jongen wodden verpulverd deur die Zweed mit zien Nederlaanse naeme en grote mond. Die jonge moet uutkieken wat hi’j d’r allemaole mar uutbraokt. Wi’j lao’n oons hier deur gieniene zwatmaeken. Iene Zweeds-Nederlaanse Oorlog (van 1658-1660) moet toch zeker genoeg west hebben? Mien slechte zin verdween vandemiddag trouwens as sni’j veur de zunne doe Suzanne Schulting wel goold wun! Now kan ‘k vannaacht toch lekker slaopen en morgen… Morgen zit ik van tien ure morgens tot vuuf ure middags mit boeken en mooie anbiedings op ‘e hobbymark in d√∂rpshuus It Buorskip in Beetsterzwaog. Kom mar langes!