Johan Veenstra
Stellingwarver schriever en verteller

Moes

Plaetst op 22 oktober 2024.

Doe ‘k vandemorgen wakker wodde ha’k drekt wel in de gaten dat poes weer een moes in de slaopkaemer brocht hadde. Hi’j zat veur et kassien te kieken. Ikke dat ding van de waand en ja, daor zat een klein en bang moesien. Poes maekte hielemaole gien anstalten en pak dat ding. Hi’j gong d’r bi’j zitten te kieken as ik him wel pakken kon. Dat lokte op et laeste, dat ik hebbe de moes weer levendig butendeure brocht. De eerste goeie daod van de dag. Daor is et trouwens ok bi’j bleven. Ik bin nao et broodeten votdaolik mit de auto naor de gerage in Et Vene reden. De auto gaf de laeste daegen an dat d’r drokverlös was. Dat een gewoepste jongkerel het in alle banen wat locht bi’j daon. Ik hebbe ok nog perbeerd kontakt te kriegen mit de gemiente omdat ze me vreugen veur een klussien wark. Mar dat kontakt mit de betreffende persoon is vandaege niet lokt. Morgen is d’r weer een dag. Vandemiddag het overbuurman Johan Moes nog even bi’j et ni’je slot in de veurdeure keken. De sleutel stoekte nog wat. Et was mar een kleinighied, dat now is echt alles goed. Annemiek Drenth stuurde me een foto angaonde mien optreden op zundag in Slien-Noord. Hier stao ik op et teniel en hebbe et hoogste woord.