Moeder

Gisteraovend he’k naor de film Boy Erased keken. Een prachtige en ontroerende film over een waor gebeurd verhael. Jared is de zeune van doomnee Marshall en zien vrouw Nancy. Bi’j die doomnee moej’ je een oerkonservatieve Amerikaanse doomnee veurstellen. De bosschopper van God die de ienige Waorhied in pacht het. De moeder van Jared is een lieve vrouw, mar ze steunt heur man. Zo heurt dat.  En dan bliekt Jared homo te wezen. Dat betekent dat hi’j de Here Jezus inruild het veur de Satan en dat hi’j naor een instelling moet daor ze zoe’n ziekte mit de hulpe van God genezen kunnen. Een walgelike, hypokriete troep waor aj’ geestelik en lichamelik mishaandeld wodden. Ien van de jongen daor maekt d’r een aende an. Mar Jared is stark, hi’j komt in opstaand en ontvlocht mit hulpe van zien moeder die et niet anzien kan wat d’r mit heur kiend gebeurt. Et indrokwekkende slot is as Jared zien vader et leksem opzegt. De doomnee kan twie dingen doen: de hadde, oerkonservatieve kristelike kop bugen of zien zeune veur altied kwietraeken. Wat een geweldig spel van allebeide. De zeune en de vader. Ik vule et as poere riekdom a’k naor zoe’n mooie film kieke en mitleve mit Jared. In Amerike bin trouwens in meer as twintig staoten nog van dat soort instellings… Et is meer as gruwelik.

Ik hadde ok een lieve moeder. Et is vandaege heur verjaordag. Ok al is ze d’r al zolange niet meer, dit blift een biezundere dag. Et spiet me zo dawwe over de tere dingen van et leven niet praoten konnen. Zi’j kon et niet, ik kon et liekemin. Dat blift mien leven laank een uterst gevulige weerwikker. Ik daenke vandaege an mien gedicht Longeren uut De overkaant van et waeter, mien laeste dichtbundel. Zo graeg zo’k willen da’k je nog es zag… Was ik mar zo dapper west as die Jared uut de film van gisteraovend.