Moard yn ‘e hite hei

Ik hebbe vandaege et verhael Verstruperi’jen ofmaekt veur et Stellingwarver tiedschrift De Ovend. Butendat he’k nog even naor de kezeboerderi’je in Berkoop west om wat lekkers te kopen dawwe morgen mitnemen zullen naor Amersfoort.

Ik hebbe de speurdersroman Moard yn ‘e hite hei van Meindert Bylsma lezen. Ik bin gek op thrillers en hebbe dit boek mit genoegen lezen. Et gaot over de rechercheurs Liuwe Bekkema en Lukas Roosjen die de melding kriegen dat Wiggele Kingma de oflopen naacht niet thuuskommen is. Ze vienen opdreugd bloed in de schure. Et dot blieken dat nogal een protte meensken op ‘e buurt de man niet lieden meugen. En dan wodt Wiggele verdronken vunnen in een jute zak die uut et waeter haeld wodt deur een visker. Wat is d’r gebeurd? Netuurlik lossen de beide rechercheurs dat op. Die beide mannen hebben zo now en dan hiele verhaelen tegen mekeer die over hiele aandere dingen gaon. Ze perberen mekeer van alles uut te leggen over dingen die in wezen niks mit et verhael te maeken hebben. Dat hoolt mi’j as lezer op. Ik moet weten wat d’r gebeurd is en wie as et daon het. Die beide mannen moe’n wat minder aemelen.