Moard oan ‘e Monsmawei

Vanaovend is in Berkoop in et kader van Eupen Stal et pergramme Piano & Poëzie. Ik hadde daor an mitdoen zuld, mar de dokter in et ziekenhuus raodde me dat vleden weke of. Ik mos eerst wat beter anstarken veurda’k weer optredens doen zol. Et spiet me slim veur mezels en de meensken die me daor vanaovend verwaacht hadden. Ik hebbe begrepen dat Christine Mulder daor now wark van mi’j veurlezen zal. Et wodt grif wel een hiele mooie aovend.

Ik hebbe de Friestaelige thriller Moard oan ‘e Monsmawei van Anders M. Rozendal lezen. Henk Schaafsma het op et dörpsfeest een peer borrels te vule had en komt eremorgens mit kopzeerte van bedde. Om wat op te knappen maekt hi’j een kuier. Vlak buten et dörp vint hi’j een vrouw die van kaant maekt is. Henk kent die vrouw. Wat is d’r naachs in en om de feesttente henne allemaole wel niet gebeurd? Et is mooi dat d’r ok thrillers in et Fries, Drents en Stellingwarfs schreven wodden. Ik wor riegelmaotig vraogd as d’r ok nog es een vervolg op Et liek in de Lende komt. Nee dus. Dat is me een vusen te dreeg kerwei. A’k tien jaor jonger west was zo’k nog wel perberen willen en schrief nog een keer een thriller mit pelisieman Rik Smit in de heufdrolle. Mar now niet meer. Ik hope dat een aandere Stellingwarver schriever zoks es perberen wil! Et zol wel wat schaemel wezen as et bi’j disse iene thriller in et Stellingwarfs blift.