Mit schrievers op petret

Ik hebbe et nog ommeraek troffen mit et weer in Braobaant. We hebben daor heerlik fietst. Now is et roetkoold en d’r staot een hadde wiend. Ik hebbe vandaege dus niet fietst, mar bin vandemiddag mit de trein naor Liwwadden west. Om drie ure ha’k bi’j OBE, tegenover de Ooldehove, een ofspraoke mit vuuf aandere schrievers (m/v) en een fotograaf. Die het oons mit ’n zessen in de binnenstad op petret zet. Dat was vanzels argens veur, mar dat is now nog een groot geheim. In de loop van et jaor wodt et wel bekend en dan lezen jim et hier ok. Nao ofloop hewwe nog wat dronken en praot in Fire an de Ni’jstad.

Nog even over mien weekaende bi’j Karel en Annie in Zeelaand. We hebben et vanzels had over dat verschrikkelike ongelok mit de ontploffende haandgrenaot op ‘e Leusderheide. Dat was gister percies zestig jaor leden. Ik hebbe dat mitmaekt, Karel krek niet. Die zat veur oons mit een koppel soldaoten in de bunker te waachten om te gooien mit scharpe haandgrenaoten. Karel wus niet meer dat et op tien meie was. Ikke wel, ik daenke d’r ieder jaor an. Morgen gaot mien twiewekelikse kollum in de Liwwadder Kraante d’r over. Hieronder dan nog een foto. Eregisteraovend zatten we op et terras van resteraant De Pastorie naost de roomse karke van Zeelaand te eten. In dat grote en indrokwekkende gebouw woonde vroeger meneer pastoor.