Johan Veenstra
Stellingwarver schriever en verteller

Mit de trein naor Nunspeet

Plaetst op 27 oktober 2024.

Ik bin vandaege mit de trein naor Nunspeet west om daor de beide tentoonstellings in et Noord-Veluws Museum te bekieken. Ik hebbe daor trouwens eerst wat eten in resteraant Eiland. Een lekker twaelfuurtien. Et Noord-Veluws Museum is een prachtig museum daor a’k elk jaor wel een keer naor toe gao. De vaaste kollektie is schitterend. Vroeger kwammen de schilders daor henne te schilderen, krek zoas ze naor Laren, Bargen en Worpswede bi’j Bremen gongen. Ze schilderden de netuur en de meensken mit heur wark: een koppel schaopen bi’j een drinkerskoele, een ossekarre mit takken op ‘e Elspeter heide, wintergezichten, schoftende manluden… De tied van de Romantiek. Zo romantisch was et vanzels niet veur de gewone man. Mar et is wel prachtig schilderd. D’r weren now twie tentoonstellings. De eerste mit wark van Rien Poortvliet, de tekenende verteller. Wat kon die man mooi dieren en meensken schilderen. D’r was van alles te zien. Netuurlik een protte netuur en wilde dieren, mar ok biebelse veurstellings. Wat een prachtig schilderi’je mit de twaelf apostels. En dan et oolde boerewark mit et oolde boereark. De keboolters niet te vergeten. En vanzels de keuninklike femilie daor hi’j slim bevrund mit was. Oolderen weten et nog wel: in 1977 leup hi’j in livrei naost de Goolden Koetse op Preensiesdag en hul hi’j et koetsedeurtien los veur Juliana. De twiede tentoonstelling hiette Ode an Tongeren. Tongeren was een kleine boeregemienschop mit Saksische boerderi’jen vlakbi’j Nunspeet. Et betrof schilderi’jen van Roelf Jongman. Die kwam zoemers naor Nunspeet te schilderen en schilderde de huzen/boerderi’jen in Tongeren. Hi’j schilderde in de geest van de Bargense Schoele. Ik vien dat ok hiel mooi. Doe ‘k alles bekeken hadde, he’k in et museumresteraant nog wat drinken had en een superlekker Rien Poortvliet gebakkien. Et was drok in et museum en dat is een goed teken! Gao daor es henne, volk! Ik kan et jim anrikkemederen!