Mit de boot vot

D’r kwammen gister verschillende reakties op mien kollum Kandinsky in de Liwwadder Kraante. ‘In juwieltsje. Sa moai skreaun,’ mailde een man. Een aandere man appte: ‘pracht kleurecolumn.’ En een man uut Beetsterzwaog wol graeg weten wat de woorden maltaepelig en biesden betekenen. Jim weten dat toch wel, dagboeklezers? Maltaepelig is uutgelaoten. Biesden is de verleden tied van et warkwoord biezen en dat is hadde lopen of draeven.

Vandaege biwwe mit de boot et waeter op west. Van half 11 vandemorgen tot kwat over 6 vandemiddag. Et was wel hiel aander weer as mit de laeste boottocht, vleden weke donderdag. Doe was et volop zunneschienweer, wiendstille en 25 graoden. Vandaege was de zunne d’r niet altied bi’j, d’r ston beheurlik wiend en mit 19 graoden hul et meerst wel op. De kotte broek kon wel an, mar ie mossen wel wat om de huud henne hebben. Mar et was een mooie dag. We hebben percies dezelde route veerd as vleden weke. Et is een mooie route, dat waoromme ok niet. Via Suawoolde en de Fonejacht-brogge naor Eernewoolde, dan een aende richting Grou en halverwege ofslaon naor De Veenhoop. Ok krek as vleden weke hewwe daor eten op et terras van hotel-resteraant Ie-Sicht. En doe etzelde pad weeromme. Hieronder twie foto’s die ‘k vandaege onderwegens maekt hebbe.