Mit de boot op et waeter

We bin de hiele lange dag mit de boot et waeter op west. Van vandemorgen 10 ure tot kwat veur 7 vanaovend. Dat we hebben de dag wel mitneumen. De temperetuur mekeerde niks an, et was 22 graoden. Mar d’r ston een best stok wiend. We weren eerst van doel en gao naor et Sneeker- of Burgumermeer. Dat hewwe toch mar niet daon mit disse bluster. We bin over Grou en Irnsum naor Akkrum veerd. De torenklokke sleug krek 12 ure doe we deur Irnsum veerden. Van Akkrum biwwe over Grou naor Eernewoolde veerd. Van kwat veur 5 tot half 6 hewwe wat eten en drinken had op et terras van hotel-resteraant Ie-Sicht. En doe biwwe over Wartena et noorden weer op gaon. De torenklokke sleug 6 ure doe we deur Wartena veerden. Onderwegens zaggen we een vader en moeder zwan mit 4 jongen. Prachtig! En doe we de boot even argens anlegden was daor een moeder-ente mit 8 jongen. As de moeder een bepaold geluud maekte kwam et hiele spul bi’j heur. Dan hej’ stuur onder de jongen. Daor kun een protte meensken niet tegenop. Zo mooi, ie kun d’r tieden naor kieken. Mar wat een zorgen om dat kleine grut groot te kriegen, want overal loeren de geveren… Hieronder een foto die ‘k maekt hebbe in Irnsum.