Mit de boot et waeter op

Ik bin vandemorgen eerst naor de internist in et ziekenhuus west veur een gesprek. Op 6 september za’k weer een daarmonderzuuk hebben. Et duurt nog even… Daornao biwwe mit de boot et waeter op west. Et was heerlik weer. D’r ston op et waeter een betien wiend, dat maekte de waarmte dregelik. Over et Preenses Margrietkenaal biwwe naor Burgum veerd en doe naor et Burgumermeer. Daor biwwe linksof gaon, de Kuukhornstervaort op. We bin tot veurbi’j De Westereen veerd en doe op et laeste toch mar weeromme naor et Burgumermeer, aanders wawwe in Dokkum uutkommen en dat was wat te veer van honk. Tussen drie en vier ure hewwe eten op et terras van et resteraant van Rekreaosiecentrum Bergumermeer (Klein Zwitserlaand). Et resteraant staot op een heuvel, van daor hej’ een prachtig uutzicht over et meer. Hieronder een foto die ‘k vandemiddag maekt hebbe van een huus uut 1736 an de Kuukhornster Vaort. Et was daor vroeger allegeer heide en bittere aarmoede mit plaggehutten. Lees de roman In fin mear as in bears van Rink van der Velde mar es! Now staon d’r daor kaptaole villa’s an et waeter.