Mit de boot et waeter op

Ik hoefde vandaege niet in Berkoop te wezen, hadde een vri’je dag. Fettje het me daor vervongen. We bin zodoende de hiele dag mit de boot et waeter op west en hebben een prachtige route veerd. We bin deur Sneek en over de Brekken gaon en doe onder de grote weg deur bi’j Oppenhuzen. We kwammen over et Jentjemeer. Dat is deur de Fammensrakken verbunnen mit de Brekken. Vervolgens biwwe over de Langweerder Wielen naor Boornzwaog gaon. En doe naor Broek bi’j De Jouwer. Wat staon overal kaptaole huzen an et waeter! Deur Goëngeriep was et een schitterende route en doe kwammen we op ‘e Goëngeriepster Poelen terechte. Omdat d’r gien terrassen an disse route laggen die los weren, hawwe zels eteri’je mitneumen en dat hewwe onderwegens behaffeld. Via de Langweerder Wielen kwammen we op et Koevorder Meer. En doe over et Preenses Margrietkenaal bi’j Uutwellingerge langes naor et Sneekermeer, et stateilaand en De Potten. Daor is morgen neffens mi’j et skûtsjesilen. Mar daor doen we niet an mit! Hieronder twie foto’s die ‘k vandaege maekt hebbe. Boven: in et Jentjemeer ligt een hiel klein eilaantien. Onder: op et Koevorder Meer wodde de locht inienend hiel donker, mar we hullen et dreuge.