Millennium

Gisteraovend he’k me meer as drie uren ommeraek vermaekt mit de film The girl with the Dragon Tattoo en vanaovend gao ‘k me twienenhalf ure lieke vule vermaeken mit The girl in the Spider’s Web. Prachtige thrillers en verfilmings van twie van de zes boeken uut de Millennium-serie. De eerste drie boeken bin schreven deur Stieg Larsson en de laeste drieje, nao de dood van Larsson, deur David Lagercrantz. Et zesde diel uut de serie he’k nog niet, mar dat boek za’k ien disser daegen bi’j Zwikstra bestellen. Heufdpersonen in boeken en films bin de journalist Mikael Blomkvist en de komputerdeskundige Lisbeth Salander die allemachtig hadde op een moter jaegen kan. Gisteraovend hadde Blomkvist een katte bi’j him op bedde. Now, dat heb ik dus ok. Allienig daoromme vien ik die man al aorig. Mar mit die katte van him leup et slecht of…

Een schoffien leden ston d’r hier een foto van een witte lidkaktus die ‘k geweldig mooi in de bluui hadde. Now dan een rosen iene. Al mien zes lidkaktussen doen et geweldig en bluuien schitterend.