Miles

Vandemiddag he’k vesite had van Deli en Elroy mit heur zeuntien Miles dat op 12 meert geboren wodde. Et was veur de eerste keer da’k as ooldomke et kereltien zag. Et is een mooi joongien! Ik hebbe een hiel schoft mit him op ‘e aarm zeten, mar hi’j het me nooit ok mar even ankeken. Hi’j was al die tied diepe in de slaop. Wat moet zoe’n klein kiend toch allemaole nog mitmaeken. Et leven begint veur him pas. En wat dat leven veur him in petto het… Et is mar goed dawwe dat van teveuren niet weten.
A’k naor de gerage west hebbe of naor de Welkoop of et Kruudvat, ik bin nog niet weer thuus of d’r is al een mailtien mit de vraoge hoe as ’t me bi’j heur voldaon het en as de service wel goed was. Ik wor d’r wel es misselik van. Wat toch een gedoe tegenwoordig. Gister kwam d’r zoe’n mailtien van bistro Jikke in Sneek. We hebben daor eregisteraovend overheerlik eten. Die kok daore verdient de komplementen. As we ok nog opmarkings hadden, vreugen ze in die mail. Now ja, die zo wil die zo zal. Wat mi’j anbelangde hadde de overigens heerlike aspergesop wel ietsien waarmer west hebben mocht. En Fettje en ik vunnen et slimme ongemakkelik en drink thee uut een mok. Dat ding wodde an de buterkaante vanzels slimme hiete. Dat we mossen et ding mit een servettien beetpakken en dan kowwe de thee opdrinken. Et is vule makkeliker en drink de thee uut een koppien of een glas mit een oor d’r an. Dat he’k ze in Sneek weten laoten. En zollen ze d’r now wat an doen? Ik betwiefele zoks in hoge maote. Jelle moet et daor mar in de gaten holen, die woont in Sneek. Mar… et eten was d’r heerlik en dat he’k ze vanzels ok weten laoten.