Miles

An et begin van de middag kree’k vesite uut Arnhem van Deli, Elroy en kleine Miles die staorigan een grote Miles an et wodden is. Hi’j is in meert twie jaor wodden en brabbelt en zingt d’r lustig op los. Ik kreeg een knuffel van him. Hi’j is gelokkig now al gek op boeken en hi’j keek mit grote verbaozing en plezier naor alle boeken in mien warkkaemer. Hi’j speulde mit twie vissen, et speulgoed van poes Marja. Die vun hi’j zo mooi dat hi’j ze netuurlik  mitnemen moch naor huus toe. We hebben genoeglik praot mit mekeer en ik hadde lekkere koeken van de waarme bakker in huus haeld. In de loop van et jaor za’k heur ni’je huus in Arnhem bekieken.

Omda’k nog niks van et Oranjekonsert heurd hadde he’k mar een mailtien stuurd naor de veurzitter van brassband Euphonia in Wolvege. Omdat alles zo duur wodt, gaot et konsert dit jaor niet deur. Et is in et vervolg ien keer in de twie jaor. Amkem jaor dus wel weer. A’k et platte van de voeten zolange mar onderhole… Ik hebbe zeker al een kleine dattig jaor ieder jaor naor et Oranjekonsert west. Ik hebbe vaeke mitdaon, d’r speciaole verhaelen veur schreven en verteld, en ik hebbe et konsert een jaormennig prissenteerd. Et is een prachtige tredisie en ik zal et van ’t jaor missen.