Mien oolde huus

Mien oolde huus komt vaeke in mien schrieveri’je veur. Veur mien gevuul zal et altied mien huus blieven. Et is bouwd in 1911 veur 900 gulden. Dat was indertied grif een protte geld. We bin now 115 jaor veerder in de tied en mien oolde huus staot now te koop veur 925.000 euro. Van 900 gulden naor even meer as 2 miljoen gulden. Dat is toch onveurstelber. A’k 30 jaor jonger was en ietsien meer centen hadde… Dan kocht ik et en zo’k daor graeg weer wonen willen.

Op 28 juni komt de verhaelebundel Yeeha! uut. Et is een bundel mit 28 verhaelen van 28 verschillende schrievers in verschillende taelen die in Frieslaand praot en schreven wodden: Aasters, Bildts, Franekers, Fries, Snekers en Stellingwarfs. D’r staot ok een verhael van mi’j in et boek. Et wodt uutgeven deur uutgeveri’je De Ryp en de prissentaosie is in et Brouwdok in Harlingen.