Meppel

We bin d’r vandaege lekker een dag op uut west. D’r was vandemorgen een straolende zunne, dat beloofde dus een mooie winterdag te wodden. Mar doe trok et dichte en bleef et de hiele dag diezig. Et was starvenskoold in de straoten en gloppen van Meppel. Daor wawwe vandaege dus. We hebben winkeld en wat drinken mit wat lekkers d’r bi’j had in resteraant De Beren. En… we hebben et Stedelik Museum bekeken dat onderbrocht is in et vroegere stadhuus. Wat een mooi Meppels zulver hebben ze daor. Et is toch werachtig gien grote stad, mar op een gegeven ogenblik telde Meppel 60 zulversmeden. Dat is niet niks! Hiel mooi was ok de tentoonstelling mit schilderi’jen van Stien Eelsingh  (1903-1964). De schilderesse woonde in Stappest en wodde dan ok de schilderesse van Stappest nuumd. Ze was lid van de bekende schildersgroep De Ploeg uut Grunningen. Hieronder een schilderi’je van heur dat now in Meppel hangt. Et bin dudelik Stappesters op dit mooie petret. Ik hebbe de meensken van et museum nog vraogd as ze oonze uutdrokking In Meppel kuj’ je keren laoten wel kenden. Ze kenden et niet. Ik hebbe ok vraogd as ze wel es van mien antrouwde femilielid Gerrit Hagevoort heurd hadden. Die woonde in Meppel en het meer as 20 meensken van de verdrinkingsdood redded en wodde zodoende onderscheiden deur Keuninginne Wilhelmina. Ze hadden d’r nooit van heurd. We hebben vanaovend waarm eten had in resteraant De Rustende Jaeger in Hooltpae.