Memory Vri’jhiedsmuseum

Et was al weer triest weer, mar we bin d’r toch gezellig een dag op uut west. In Nijverdal hewwe et Memory Vri’jhiedsmuseum bekeken. Hiel arg mooi! We hebben daor eerst wat drinken had mit wat lekkers d’r bi’j. Ie kun een route volgen en dan wodt je alles verteld over de ofloop van de Eerste Wereldoorlog, et interbellum en de Twiede Wereldoorlog. Ie kun et lezen op teksten an de mure mar d’r bin ok foto’s en tal van prachtige diorama’s te zien. En dan een hiele biezundere film over D-Day op 6 juni 1944. De allieerde invasie in Normandië. As toeschouwer zit ie in een Duutse bunker en dan ziej’ al die boten ankommen. De paniek bi’j de Duutsers vlak veur je, en inslaon van de eerste bommen. Dat maek ie levensecht mit. Et dreunt om je henne en de stoel waor aj’ op zitten begint te schudden. Hiel biezunder! D’r is ok van alles te zien over de oorlog in Overiessel. D’r hangt een mooi gedicht in et Sallaans van de bekende dichteresse Johanna van Buren. Twie vri’jwilligers hebben oons onderwegens iederkeer van alles verteld en we hadden mooie gesprekken. We weren et d’r allemaole over iens dat d’r een huurmoordener op Poetin ofstuurd wodden moet. Mar ja…  In zokke museums, hoe mooi ok, vuul ie je ok vri’j machteloos, want de meensken hebben niks van alle vroegere ellende leerd. Hieronder een foto die ‘k vandemiddag maekt hebbe van een klein onderdiel van ien van de diorama’s. Et begin van de oorlog. Nederlaanse soldaoten op ‘e fiets bi’j de greens mit Duutslaand. We hebben om vier ure luncht in resteraant Tante Pos in et vroegere postkantoor in Ommen. Daor hawwe al es twie keer eerder west, doe we beide keren een fietstocht in Ommen en omstreken maekt hadden.