Meleur mit de fiets

De laeste weke is d’r iederkeer wat mit de fiets te redden a’k in de vuufde versnelling rie. Dan kraekt et en schöt et deur. Hoe moe’k dat uutleggen? Vroeger hadden we et geleuf ik over deurtrappen. Mar et gaot soms ok een peer daegen goed, dat zoks dan dus niet gebeurt. Omda’k vandemorgen toch naor Fysiosport mos in Wolvege, he’k de fiets even naor de fietseman brocht. Nao de fysio he’k him weer ophaeld en… nao drie kilemeter fietsen was et dezelde ellende al weer. En mien fiets is nog gien half jaor oold. Ik zal d’r morgenvroeg weer mit henne. Wat he’k toch een hekel an dit soort gedoe. Fysio bevaalt me trouwens  hiel goed. Et is iederkeer etzelde koppeltien meensken. Die begin ik now wel aorig te kennen. Katrien was jaorig west en trakteerde nao ofloop op wat lekkers bi’j een bakkien drinken. Vandemiddag he’k weer naor Eupen Stal west om boeken te verkopen. Hieronder nog een foto van poes Marja. As poes op disse meniere halverwege de trappe liggen gaot, wil hi’j mit me speulen. En dat doen we dan… Dan moe’k him bi’j de huud en de stat pakken en dan hapt en slat hi’j speuls naor me.