Meertaelighied

Een schoffien leden wodde ‘k deur Abel Darwinkel, de direkteur van de Stellingwarver Schrieversronte, vraogd om een stok te schrieven over meertaelighied en dan in et biezunder over Fries en Stellingwarfs. Een artikel van 500 woorden zol al mooi wezen. Et is een artikel van meer as 1.500 woorden wodden. Ik hebbe et him toestuurd. Ik gao in op al mien optredens in et Friese Frieslaand, mien stiekelstokkies veur Omroep Frieslaand en da’k as Stellingwarver schriever de Rink van der Veldepries kregen hebbe. Een Friese literaire pries veur een Stellingwarver schriever. Dat is toch niet gek! Et artikel van mi’j het as titel Elke tael is lieke vule weerd. En zo is dat. Et Fries is niks meer weerd as et Stellingwarfs en aandersomme ok niet. Ik hebbe begrepen dat alderhaande bi’jdregen van meerdere meensken in een boek kommen te staon dat van ’t jaor uutkommen zal.

Doe ‘k vandemorgen van bedde kwam was de wereld een betien wit doe ‘k deur et slaopkaemerraem keek. Ik hebbe d’r mar een foto van maekt. De selonwaegen op ‘e foto staot op et plak daor vleden jaor een huus ofbraand is. D’r zal binnenkot een ni’j huus daelezet wodden. Ik hebbe vandaege alvast de verhaelen rippeteerd die ‘k overmorgen vertellen zal in et gemientehuus in Wolvege.