Johan Veenstra
Stellingwarver schriever en verteller

Medische dag

Plaetst op 11 april 2024.

Vandaege veur een weke ha’k mien twiede staaropperaosie an mien goeie oge. Daor kreeg ik doe een kappien overhenne. Ik hadde daor drekt hinder van. Ik mos doe lopende et ziekenhuus uut mit mien slechte oge en dat wol niet hiel goed. Ik leup as wa’k wat dronkend, leup onvaaste en was mien evenwicht kwiet. Harry stelde nog veur me in de aarm te nemen, mar dat was me ok te mal. Zes naachten daornao mos ik dat kappien ok op hebben. Ik wodde van zundag of licht in et heufd en was morgens dwiel a’k me op bedde ommekeerde. Dan begon alles te dri’jen. Mien konklusie was dat dat mit et ofdekken van mien goeie oge te maeken hebben mos. Veur de wissighied he’k et ziekenhuus vandemorgen beld. Mar mien konklusie klopte niet, zee een overigens hiele aorige vrouw, ze kregen nooit zokke klaachten nao een staaropperaosie. Ik mos mar naor de huusdokter gaon. Daor kon ik an et aende van de morgen nog terechte. De dokter het mien bloeddrok meten, die was zoas altied prima. Hi’j het mien verhael anheurd en doe zegd dat hi’j et veur honderd percent mit mien konklusie iens was. Now ik et kappien niet meer op hoeve zal et staorigan weer bekommen, mar dit kan wel een weke of wat tied neudig hebben. Niet zo mooi. As et over is za’k de ombudsfunktionaris van et ziekenhuus hierover bellen. Ze hebebn me bi’j de dokter de oren ok weer uutspuit, dat was op 2 jannewaori ok al gebeurd, mar et zat weer hielemaole vol en ik heurde haost niks meer. Et is allemaole wat. Dat was nog niet alles… Ien keer in et jaor krigt poes Marja een oproep om bi’j de dokter te kommen veur een onderzuuk en een spuitien tegen malle kwaolen. Dat was vandemiddag dus. Et is weer een dramatische tocht wodden naor Noordwoolde mit vreselik geklaeg dat nooit stopte. Ik vuulde me slimme schuldig, want ik dee him dit an. Doe we weer thuus weren he’k et ofkocht mit lekkere snupies van Whiskas.