Medische dag

Et was een betien een medische dag. Ik was vandemorgen al om acht ure bi’j Voetmax in Beetsterzwaog. De voeten bin me al een hiel schoft wat gevulig bi’j et lopen. Ze hebben me verteld da’k holle voeten hebbe. Nooit van heurd… Ik hebbe mien voeten op karbonpepier zet, de boel is ofmeten en androkt. Karbonpepier bruukten we vroeger in de schriefmesiene tussen twie vellen pepier in. Mar et wodt hier dus nog bruukt. Et was dudelik da’k steunzolen hebben moet. Die bin over drie weken klaor, dan za’k weer in alle vroegte naor Beetsterzwaog. Onderwegens naor huus he’k 50 exemplaoren van et Nijntje-boekien Pake en beppe Pluus bi’j de Schrieversronte anbrocht. Van Hennie he’k een peer bakkies thee  kregen en we hebben even praot. Doe ‘k thuuskwam was Anke doende et huus schone te maeken. Drekt nao de middag bin ‘k op ‘e fiets stapt en naor Marian in Wolvege gaon veur massage. Vervolgens naor de huusdokter om een brief op te haelen. D’r moet nog een keer bloedprikt wodden. Bi’j de Lende langes bin ‘k weer naor huus fietst. De temperetuur leup vandemiddag op naor 33 graoden. Et is nog altied smoorhiete en d’r staot een laffe wiend. Ik hebbe onderweg een foto maekt van meule De Gooijer an de Lende onder Wolvege. Zie hieronder.

De gemiente De Fryske Marren het twie wethoolders van Stellingwarver komof. Ien van de beide kwam hier an et aende van de middag om een exemplaor van mien laeste boek Naozoemerlaand. Dat is een kedo veur die aandere wethoolder omdat die jaorig west het. De Friezen hebben vanzels niet in de gaten dat zokke wethoolders mitien ok Stellingwarver infiltraanten/spionnen in Fries gebied binnen.