Medemblik

D’r kwammen gister een peer aorige reakties op mien kollum Komplot in de Liwwadder Kraante. Lenie uut Makkum wol me bedaanken veur al die mooie verhaelties. As d’r poezen in veurkwammen, vun ze et extra mooi. Poes Marja begint op disse meniere ok beroemd te wodden! Frits uut Sneek, mar geboren op Texel, bedaankte me veur de mooie kollum, mar hi’j verwonderde him slim over mien uutdrokking dat iene naor Medemblik moet as hi’j d’r mal in omme begint te praoten. Hi’j zol zeggen van Franeker. Ja, dat zeggen wi’j netuurlik ok, mar Medemblik is oolder. Doe d’r in Franeker nog gien psychiatrische instelling was, was zoks d’r wel in Medemblik. In et Stellingwarfs Woordeboek staon tal van veurbeeldzinnen. De woordeboekgroep van Ni’jhooltpae gaf op: Ze moe’n je naor Medemblik sturen! En de groepen van Oosterwoolde en Noordwoolde: Die kun ze wel naor Medemblik brengen. De groepen van Hooltpae, Scharpenzeel en Blesdieke gavven op: Hi’j is riepe veur Medemblik. Et wodde dus echt overal in de Stellingwarven zegd. Ik vien et wat vremd dat een man van Texel dat niet kent. Vanof Texel was Medemblik dichterbi’j as Franeker. In Buil kenden ze neffens et Stellingwarfs Woordeboek ok nog een riempien over Medemblik: Oolde Kaatje van Medemblik/Had de kont van koffiedik.

Ik hebbe al weer een boek van de Noorse thrillerauteur Samuel Bjork lezen: De jongen in de sneeuw. In kotte tied he’k now vier boeken van him lezen. Prachtig! Ze gaon allegeer over de rechercheurs Holger Munch en Mia Krüger.  In dit boek wodt in een bargmeertien een vermoorde 22-jaorige ballerina vunnen. Veur Holger en Mia is d’r dus wark an de winkel. Et was weer hiel spannend. Mar et spietige is wel dat d’r niet meer boeken van Bjork over dit rechercheursduo binnen. Die man moet dus niet wat om de bulten springen, mar aachter zien buro zitten gaon te schrieven! Ik wil graeg meer lezen!