Marprinses en Rotterdam

Vandemorgen he’k Jan, Durkje en Riemie in Wolvege oppikt en we bin doe naor Eernewoolde reden. Daor bin we an boord gaon van de Marprinses. Vandaege hawwe oonze jaorlikse boottocht van de post-aktieven van de belastingdienst en eventuele partners. We begonnen mit wat drinken en een hiempien oranjegebak. We konnen veerder vergees drinken en ze kwammen iederkeer mit happies bi’jlanges. Stokkies wost en bitterballen en zo. Onderwegens kregen we een prima waarm buffet. We hebben eerst wat bi’j Eernewoolde ommekruusd en bin doe bi’j resteraant Ie Sicht, daor we eregister nog eten hebben, langesveerd naor Grou. Daor konnen we van 2 tot 3 ure wat ommestappen en doe bin we weerommeveerd naor Eernewoolde. Et was heerlik weer, we zatten boven op et dek in de zunne. Et wodde zoe’n 22 graoden op et waeter. Et mooie was dawwe mar 15 euro hoefden te betaelen. De rest wodde betaeld deur et ministerie. De belastingbetaeler dus. Daor bin we iederiene slim daankber veur. Zo kan de gewone man ok es een daggien et waeter op. Et was al mit al een prachtige dag!

Mar ie hebben schippen en schippen… Gister kree’k foto’s appt van de vekaansiereize van Harry, Frans en Jan. Zi’j veren op een funship mit een peer duzend aandere passegiers. Mit de Rotterdam maeken ze een luxe cruise naor de Noorse fjorden. Dat is wel even wat aanders as de Marprinses. Dat kost heur meer as 15 euro de dag. Overdag bin ze bloot of in de ni’jste badmode in sauna of zwembad. Of ze lezen in een vlotte broek van Armani een tiedschrift. En aovens gaon ze in een smoking naor et casino of ze bin bi’j een diner-dansant en daansen omstebeurten mit de vrouw van de kaptein en een smoorrieke mar wat wulpse freule uut Twente. En dan et eten… Sjieker en luxer nog as bi’j Jan Smink. Niks gien hiempies wost en bitterballen. Ik gunne et heur graeg. Verschil moet d’r wezen. Wi’j bin vandaege zonder hantavirus weer thuuskommen, ik hope dat zi’j ok zonder malle mankementen goed thuuskommen zullen!

Hieronder twie foto’s: Boven: de simpele Marprinses in Grou. Onder: de luxe Rotterdam in Olden.