Mark in Beetsterzwaog

Et was vandaege et mooiste weer van de wereld en ik kon niet buten wezen. Ik ston mit een boeketaofel op ‘e hobbymark in et dörpshuus van Beetsterzwaog. Ik gao daor ien keer in et jaor henne. Deur et mooie weer kwam d’r minder volk as aanders, mar ik hebbe toch goed verkocht. Et was zoas altied hiel genoeglik. Ik hole van dit soort marken, want ie praoten dan mit alderhaande meensken. Annie kwam ok langes, die kenne ik nog van de ulo in Wolvege, ze zat in de eerste klasse naost Jannie Hooltman en woont now in Beetsterzwaog. En ja, ik hadde gister in mien dagboek schreven waor a’k vandaege zitten zol en dat meensken mar langeskommen mossen. En doe kwammen Bert en Jikke uut Frieschepaolen dus, want die lezen mien internetdagboek. Ze hadden een peer boeken van mi’j bi’j heur en wollen graeg dat ik daor wat inschrieven zol. Zoks vien ik mooi en doe ik graeg. Et is toch hatstikke biezunder dat wildvremde meensken op die meniere zomar naor me toe kommen. Ik vien dat slimme mooi! We hebben genoeglik even praot. D’r was ok een man op een scooter uut Liwwadden. Die vertelde me dat hi’j vleden weke vuufhonderd kilemeter op zien scooter reden hadde. En… as et aanst weer waarm weer wodde dan struupte hi’j him onderwegens argens uut om in et waeter van een sloot of kenaol lekker een schoffien te zwemmen! Ik raode et him now nog niet an! Ik kan alle schrievers anraoden en gao mit heur boeken op marken staon. Et is echt waor een feest om mit zovule verschillende meensken te praoten. Veurdat et vandemorgen begon he’k een foto maekt van de grote zael van et dörpshuus. Waor de rooie bak onder staot, dat is mien taofel. Tussen de middag he’k een lekker koppien tomatesoep en een brotien kroket had. A’k et platte van de voeten onderhole gao ‘k ankem jaor zeker weer naor Beetsterzwaog!