Marjan Berk uut de tied raekt

Marjan Berk is vandaege uut de tied raekt. Ze is 93 jaor wodden en ik daenke mit respekt en genoegen an heur weeromme. Oonze wegen hebben mekeer meerdere keren kruusd. Ze hadde indertied een huus in Kaelenbarg. Ik hebbe heur verhael Een slechte vrouw uut de bundel Liefde en haat vertaeld in et Stellingwarfs en dat staot in mien boek Verrassend Stellingwarfs. Marjan was bi’j de prissentaosie van et boek op 25 september 1998 bi’j Dragt in Wolvege.We hebben ok een peer keer tegere optreden, zoas veur et Schrieversfestival van Stienwiek in Ooldemark. Zodoende hadde zi’j boeken van mi’j en ik hadde boeken van heur. In heur bundel Liefde en haat schreef ze op 27 december 1991: Voor Johan, die weet hoe moeilijk ’t is! Marjan Berk. En op 31 meert 2012 schreef ze in Rook in de ribben: Voor Johan! Met respekt! Marjan Berk. En op dezelde daotum in de bundel Oud is in: Voor Johan! Marjan Berk. Ze nam gien blad veur de mond en dee gien konsessies. Dat wardeerde ik slim. Daor ken ik trouwens een mooi verhael van. Ze is oold wodden. Ik moet nog mar zien da’k et platte van de voeten zolange onderholen kan…

Om goed tien ure is Ria vandemorgen weer votgaon. Eerst naor Jan en Ellie, hier ok in Ni’jhooltpae, en now is ze grif al weer thuus in Papendrecht. We hebben tegere een peer mooie daegen had. Ik moet ok es weer naor heur toe!

Vandemiddag he’k naor et zoemerkonsert van et Nijkoor west in de Nicolaaskarke van mien dorp. De karke zat praktisch vol. De titel van et pergramme was Wat veur weer zol et wezen in Hooltpae? Et koor zong lieden die mit et weer te maeken hadden en mit de jaorgetieden. Een peer lieden: Der Schnee zerrinnt van Franz Schubert, The rainy day van Arthur Sullivan en Les feuilles mortes van Joseph Kosma. De dirigent was Klaas Peter van der Laan. Meziek: Tjako van Schie (piano), Jan van der Sluis (dwasfluite) en Peter Hiemstra (akkordeon). Et koor zong prachtig. Maartje van den Bosch deklemeerde et gedicht De bleeke jongeling van Piet Paaltjens uut et boek Snikken en grimlachjes uut 1867. In et pergramme ston Snikken en glimlachjes. Mar dat klopt toch niet? En ja, Conny Stuart zong indertied dat mooie lietien van Harry Bannink: Wat voor weer zou het zijn in Den Haag? Minke Postma hadde daor een Stellingwarver versie van maekt en zong dat mit et Nijkoor. Een mooie middag!

En dan nog een foto van gister. De mi’j onbekende Peter uut Grou wol gistermiddag nao de opera an de Scheene mi’j beslist op petret zetten bi’j mien gedicht Geheim. En dat is dus gebeurd. Et is ien van de vier gedichten van mi’j die op hadstienen plaeten in de Rottige Miente liggen.