Marianne von Werefkin

Ik bin d’r vandaege even tussenuut west. In de loop van de morgen bin ‘k mit de trein naor Zwolle gaon. Daor he’k eerst in resteraant Ensemble wat dronken en twie plakkies bolle mit twie Bourgondische kroketten had. En doe bin ‘k daor de weg oversteuken naor Museum De Fundatie. Daor he’k een wondermooie tentoonstelling bekeken: Marianne von Werefkin – Pionier van het expressionisme. D’r komt allemachtig vule volk op of, dat et was d’r hatstikke drok. Marianne von Werefkin (1860-1938) wodde geboren in et tsaristische Ruslaand. Ze kreeg les van Ilja Repin, de beroemde schilder van et realisme. In 1896 gong ze mit heur partner, de schilder Alexej von Jowlensky naor München. Mar doe de Eerste Wereldoorlog uutbrak mochten ze daor niet blieven en gongen ze naor Zwitserlaand, Genève en Zürich. Omdat ze niet hangen blieven wol in et realisme begon ze in 1906 an et expressionisme. Krek as Wassily Kandinsky en Franz Marc wodde ze lid van de beroemde keunstenersgroep Der Blaue Reiter. Vleden jaor he’k in Amsterdam de grote tentoonstelling mit wark van Kandinsky zien. Daoromme wo’k now ok beslist naor Zwolle toe. Nao Zwitserlaand woonde Marianne von Werefkin in Ascona an et Lago Maggiore. Hieronder twie schilderi’jen van heur die now in Zwolle te zien binnen. Boven: Haast (schoele) uut 1906. Onder: De rooie boom uut 1910. Weeromme in de trein naor huus zat d’r een donkere man aachter me in himzels te zingen: lalalalalala… Zo gong et mar deur. Och now ja, een meens moet toch wat.