Marian en Ton

Vandaege he’k weer in Berkoop zeten en et was de beste verkoopdag tot now an toe. Ik hebbe vandemorgen eerst een aende fietst, bosschoppen daon, en een brotien hamburger mit mayo had in Berkoop. En doe he’k mien vaaste plakkien weer opzocht op ‘e Eupen Stal. In de rebriek Gehoord en Gezien in de Liwwadder Kraante wodde d’r gister werachtig nog tiedinge van daon dat ik daor daegs zit. En doe kreeg ik Marian en Ton op vesite. Ik wus dat ze kommen zollen. Ze weren onderweg van Leusden naor huus (Hippolytushoef op et mooie Wieringen). Ze nammen lekkers veur me mit: koeken van de waarme bakker bi’j heur weg en een krukien Wieringer Gaanzebitter. We hebben genoeglik even praot en ze bin mit mien laeste twie boeken weer op huus an gaon. Ik zal binnenkot een keer naor heur toe, want ik kenne ze al jaoren. Ik hebbe al es optreden bi’j heur thuus veur Marian heur verjaordag. Fettje en ik hebben al es fietsen bi’j heur huurd (De Groot Recreatie) en we hebben doe een fietstocht over Wieringen maekt. Ik hebbe ze ok troffen bi’j optredens van mi’j in et theatertien van Aris Bouwens in Noord-Scharwoolde. Ik wodde geweer dat Aris in meie wegraekt is, dat ik zal zien vrouw Corrie nog een brief sturen. Over Aris morgen of overmorgen meer in dit dagboek. De laeste keer da’k Marian en Ton zien hebbe was, ok al weer jaoren leden, in Amsterdam. Wi’j kwammen krek uut de parkeergerage veur et Centraol Stesjon en zi’j gongen d’r in.  En wie kwammen doe vandemiddag ok nog langes in Berkoop? Dat weren Binie Bos en heur man. Eregister he’k et boek van Binie, Blauwblomme, hiere hiel lovend bespreuken. Dat was ze an de weet kommen en ze vreug as d’r wel foolders van heur, betreffende dat boek, bi’j oons liggen mochten. Van mi’j moch dat wel. Ik hebbe de foolders anneumen en doe bin ze et mooie weer weer ingaon. En was zodoende een nogal roezige mar mooie dag. Ik hebbe vandaege trouwens ok nog 32 kilemeter fietst.