Margriet Brandsma – De heks van Anjum

Ik hebbe gisteraovend naor de vergeerdering van Plaetselik Belang in oons mfc De Ni’je Stienze west. Hopelik komt d’r es een keer schot in de plannen om huzen te bouwen in Ni’jhooltpae. Daor is groot verlet van, mar et duurt allemaole zolange. Nao et schoft kwam Margriet Brandsma an et woord. Ze is vanzels nog wel bekend as verslaggever, vaeke vanuut Berlien, veur et NOS-journaal. Ze het jaorenlaank onderzuuk daon naor de beruchte pensionmoorden die an et aende van 1997 an et locht kwammen in Anjum. Ze schreef daor et boek De heks van Anjum over. Neffens mi’j vertelde kammeraod Gé uut Borne oons indertied dat een kammeraodske van him krek in die tied in dat pension in Anjum uutvanhuus was en zodoende te maeken kreeg mit verheuren van de pelisie. Margriet Brandsma het veur et boek ok mit heur praot. Margriet daenkt trouwens dat d’r vule meer an de haand west het as pelisie en justitie oons indertied vertelden. Pensionhoolster Marjan van der E. is veroordield veur twie moorden. Ze zol twie jonge kerels, die vule groter en starker weren as zi’j was, van kaant maekt hebben en bedobbed hebben op et hiem van et pension. Marjan van der E. het altied ontkend, mar het d’r jaorenlaank veur in de gevangenis zeten. Neffens Brandsma is d’r te weinig andacht besteded an de hennepkwekeri’je in de schure van et pension. Daor zat een beruchte krimineel aachter die ok infermaant van de pelisie was. Het krimineel Jaap et misschien daon of was die d’r bi’j betrokken? Et hangt van de Hoge Raod of as et perces hereupend wodt of niet. Mar omdat Marja van der E. niet meer leeft, is die kaans vermoedelik niet slimme groot. Margriet Brandsma kon prachtig vertellen. Et was zuver een thriller daor we naor luusterden. Et was een goeie zet van Plaetselik Belang en hael heur vanuut Amsterdam naor Ni’jhooltpae.