Mankelieke boottocht

We bin vandaege mit de boot et waeter op west. Et was heerlik weer, de temperetuur leup op naor 24 graoden. D’r ston liekewel beheurlik wat wiend. Et kan mar zo de laeste boottocht van dit jaor west hebben. As et now haastig begint te wodden… Ik hope dat et nog een keer kan. Zeker is dat de boot in de loop van september et waeter uut gaot. As et meitied wodt en de sepiepen bluuien bin ik altied wat mankeliek. Dan vraog ik me mit et oolder wodden of hoevaeke a’k de sepiepen nog roeken mag. En dan komt de zoemer… Mar now is die ok al haost weer veurbi’j en ok dat maekt me wat mankeliek. Want ja, hoevule zoemers mag ik nog mitmaeken? Niks is vanzelssprekend op disse leeftied. We hebben vandaege in de buurt van Eernewoolde en De Veenhoop ommekruusd. Naor dat laeste dorp za’k ankem weke vri’jdag, want dan is daor een literair fesien! Daor vertel ik laeter wel meer over. Omdat et terras van Ie-Sicht pal op ‘e wiend lag, hewwe vandemiddag eten op et terras van Princenhof. Daor zat et heerlik uut de wiend. Hieronder twie foto’s die ‘k vandaege maekt hebbe. Een boot mit brune en een boot mit witte zeilen. Op ‘e boverste foto staot in de veerte et karkien van Warstiens.