Makkum an Zee

Ik bin vandemiddag dan eindelik naor Makkum west te vertellen naodat et al twie keer uutsteld was vanwege corona. In Het Anker moch ik vertellen veur de leden van PCOB en KBO. Vroeger wodde et Stellingwarver dörp Makkinge ok wel van Makkum nuumd. In et Stellingwarfs Woordeboek wodt et angeven as Makkem. Om onderscheid te maeken mit et Makkum daor as ik vandemiddag was, wodde dat plak hier wel Makkum an Zee nuumd. Dat he’k me temeensen wel es vertellen laoten. Die zee was vanzels de Zuderzee. Et was een genoeglike middag in Makkum an Zee. Zowel an et begin as nao ofloop wodde d’r andacht besteded an de oorlog in Oekraïne en d’r wodde bidded veur de meensken daore die now zo in de ellende zitten. Om kwat over vufe wodden in hiel Nederlaand de karkeklokken luded veur Oekraïne. Ik hebbe krek even butendeure staon te luusteren naor de karkeklokke van Ni’jhooltpae. Et was zuver een ontroerend mement. We leven now in een uterst geveerlike tied. Et is beslist niet ondaenkber dat Ruslaand atoombommen inzetten gaot. Et is haost onveurstelber, mar een gek is overal toe in staot. En wie stopt Poetin nog? Wie het invloed op zoe’n iene? Ik daenke dat al die sjerpslikkers om him henne in wezen doodsbenauwd veur him binnen en dat hi’j doen kan wat hi’j wil. De resteraosie van et Grote Russische Riek. Op wat veur gruwelike meniere dan ok.