Longerlaand

Ik hebbe krek naor oonze gruunte- en bloememark bi’j et mfc west. Ik hebbe daor twie bossies bloemen kocht. Iene veur hier in huus en ik neme morgen iene mit naor Berkoop, veur in de ruumte waor ik zitte te verkopen. Ik hebbe ok nog drie potties sjem kocht om vot te geven en een lekker stokkien appelgebak. Dat eet ik vanaovend lekker zels op. Ik moet mezels mar wat verwennen, een aander dot et niet.

Lachende kwam d’r een vrouw op me of op Eupen Stal. Nee, ze wol gien boek van me kopen. Ze hadde op Eupen Stal al een boek van me kocht en dat hadde ze nog niet lezen. Dat mos eerst en dan een ni’j boek. Ik was beni’jd wat veur boek ze van me kocht hadde. Et bleek Longerlaand te wezen. Dat mooie boek mit gedichten van mi’j, beelden van Peter Hiemstra en foto’s van Sijtze Veldema. Et boek kwam in 2009 uut en wodde verkocht in dat jaor. We hadden doe ok de tentoonstelling mit dezelde naeme mit al dat moois in et gebouw van de Schrieversronte. Et boek raekte doe votdaolik uutverkocht. Dat is dus 15 jaor leden. En as die vrouw dat now nog niet lezen het, zol ik et dan wel beleven eer ze weer een boek van me kopen gaot. Dan ma’k wel hiel arg oold wodden en dat zit d’r ongetwiefeld niet in.

Ik heurde vandaege dat de Drentse schriefster Janny Kok wegraekt is in de leeftied van 91 jaor. Dat is een mooie leeftied… Janny en ik belden mekeer altied mit oonze verjaordaegen en die tillefoonties za’k now in et vervolg echt missen gaon.