Londen

Gister schreef ik dat Haarm en ik in november 1978 in Londen weren en veur Buckingham Palace stonnen en daor bi’j toeval keuninginne Elizabeth thuuskommen zaggen in een auto. Elizabeth was percies twintig jaor oolder as mi’j. Zi’j is 96 wodden, ik bin now 76. In 1978 was zi’j dus 52 en ik was 32 jaor. D’r weren doe twie boekies van me uutgeven: Wilde gaanzen en Fluitekruud. As ze doe tegen me zegd hadden da’k zeker nog 26 boeken schrieven zol, negen jaor laank kollums vertellen zol veur Omroep Frieslaand, langer as twintig jaor kollums schrieven zol in de Liwwadder Kraante en meer as drieduzend keer argens wat vertellen zol uut eigen wark… Ik zol vermoedelik mal raozende votsteuven wezen. En toch is et gebeurd. Haarm het me daor in Londen ok op petret zet. Onderstaonde foto is maekt op 10 november bi’j et British Museum. Nog even over Londen… Ik zag gisteraovend de toespraoke van de ni’je keuning Charles III. Ik vun et mooi, ontroerend en hiel meenselik. Ie kun van de man vienen waj’ d’r van vienen, mar dit dee hi’j hiel goed!