Loflied

Vandemorgen he’k een vrouw op vesite had en vandemiddag bin ‘k bi’j een vrouw op vesite west. Vandemorgen was Anja hier, die komt hier ien keer in et jaor. En vandemiddag bin ‘k naor Marian west veur fysio. Nekke, schoolders, rogge, heupen en rechteraarm het ze onderhanen neumen.

De laeste tied he’k et boek Theo Kurpershoek. Een loflied op de zichtbare wereld lezen en veural ok bekeken. De tekst in et boek is van Marguerite Tuijn. Theo Kurpershoek (1914-1998) was bi’j een groot pebliek bekend as vormgever van de bekende Sallemaander-reeks van uutgeveri’je Querido in de jaoren ’50 van de veurige ieuw. Mar Kurpershoek was ok een bekend grafikus en ien van de oprichters van schildersgroep De Realisten. Hi’j was docent an de Rietveld Akedemie en laeter de Rieksakedemie. In et boek staon een protte ofbeeldings van zien wark: petretten, stillevens, interieurs en laandschoppen. Een prachtig uutvoerd boek!