Liwwadden

Vandemiddag he’k mit Douwe (Kootstra) op vesite west bi’j Sieger (Rodenhuis) en Geertje (Kingma) in Liwwadden. Dat was in wezen een anlopien naor de veertiende meie. Dan verschient in mfc Froubuurt in Froubuurt/Vrouweperochie heur boek Feranderd perspektyf/Veranderd perspectief. Een boek over Sieger zien Bildtse jeugdjaoren in et Bildts en et Nederlaans. Et wodt uutgeven deur uutgeveri’je Louise in Grou. Martsje de Jong zal de middag prissenteren, Hein Jaap Hilarides zorgt veur de meziek en et schrieversduo wodt interviewd deur Douwe en mi’j. We hebben vandemiddag ofpraot dawwe niet toegeliekertied interviewen, mar dawwe omstebeurten een blokkien doen zullen. Et was goed om van teveuren even bi’j mekaander te kommen om wat dinkies deur te nemen. Ik bin now krek weer thuus, want ik bin in Liwwadden bleven te eten. Lekkere eerpelpuree mit asperges en zalm. En dan ok nog wat lekkere sop veurof en wat lekkers nao! Wat een verwenderi’je!